കുവൈത്ത് സിറ്റി: ഗൾഫ് കപ്പ് സെമി ഫൈനലിന് യോഗ്യത നേടി കുവൈത്ത് ടീം. നിർണായകമായ അവസാന ഗ്രൂപ്പ് മത്സരത്തിൽ ഖത്തറുമായി സമനില നേടിയതോടെ കുവൈത്ത് സംഘത്തിന് അവസാന നാലിൽ എത്താനായത്. ജാബർ അൽ അഹമ്മദ് ഇൻ്റർനാഷണൽ സ്റ്റേഡിയത്തിൽ നടന്ന മത്സരത്തിൽ, കുവൈത്ത്, തങ്ങളുടെ പോയിന്റ് അഞ്ചാക്കി ഉയർത്തി. ഒരേ പോയിന്റും ഗോൾ ശരാരിയുമാണെങ്കിലും ഫെയർ പ്ലേ നേട്ടത്തോടെ ഗ്രൂപ്പിൽ ഒമാൻ ആണ് ഒന്നാം സ്ഥാനത്ത്. അവസാന ഗ്രൂപ്പ് മത്സരത്തിൽ കുവൈത്തും ഖത്തറും ഓരോ ഗോളുകൾ നേടിയാണ് സമനില വഴങ്ങിയത്. രണ്ടാം പകുതിയുടെ 74-ാം മിനിറ്റിൽ മുഹമ്മദ് ദഹാമിലൂടെ കുവൈത്ത് മുന്നിലെത്തി. വിജയം നേടി ടീം മുന്നേറുമെന്ന് കരുതിയപ്പോൾ അവസാന വിസിൽ മുഴങ്ങാൻ സെക്കൻഡുകൾ മാത്രം ബാക്കിയുള്ളപ്പോൾ മുഹമ്മദ് മുൻതാരിയിലൂടെ ഖത്തർ സമനില നേടിയെടുക്കുകയായിരുന്നു.
